Mohbad is dead: Olamide, Tacha, odas react to tori of singer Ilerioluwa Oladimeji Aloba death

Ogbonge musician and record label YBNL CEO Olamide Adedeji wey many pipo sabi as Olamide don react to di tori wey dey fly up and down about di death of musician Ileriooluwa Oladimeji Aloba wey pipo sabi as Mohbad.
Na on Tuesday evening, tori begin trend on social media say di Nigerian artiste, don die.
Di Nigerian rapper and music producer, Olamide bin post for X say “Damn! Mohmad" and add heart break emoji, e also post say "Dis life".
Dis na afta tori of di death of di 27-year-old begin spread for Twitter.
Reality TV star Tacha also post about di tori.
End of Recommended articles
Details of di tori neva clear and no official confirmation don come out from im management or family.
However, plenty of im fans, oda musicians and Nigerians don dey react to di tori of im death as dem mourn and send tribute on social media.
One of im colleague, Emeka Akumefule, aka Blaqbonez post on X say, "RIP Mohbad, may you find peace."
Mohbad bin dey under Naira Marley “Marlian Records” but e comot di label for 2022.
E popular for im hit songs wey include Ponmo, Feel Good, and KPK (Ko Por Ke) wit Rexxie wey dem nominate three times for 2022 Headies awards.
Screenshot of Olamide reaction
Mohbad na one of Nigeria rising musician. Dem born am for Lagos state, Nigeria for June 1996.
E bin sign under Naira Marley, “Marlian Records” but e comot di label for 2022 in di middle of some controversies.
For inside one recent interview e do wit former Reality TV star Tacha wey also be radio host, Mohbad bin tok about im relationship wit Naira Marley.
Tacha share clips from di interview few hours afta tori of im death break.
E tok for di interview say, “ We just split from Marlian music to Imolenization, we just wan be on our own but e no come easy."
E say e no easy but im dey find im way. E add say dem no dey fight and tins dey cool between dem.
Mohbad bin release im first album, Light EP for 2020. E dey popular for hit singles like Ponmo, Feel good and Ko Por Ke wit Rexxie.
E also don do collabo wit artiste like Bella Shmurda, Small Doctor, Zlatan, among odas.
2023 BBC. De external site no concern BBC.